Monolog Bahasa Banjar: Anggang Nang Panghabisan - Jurnal Banua
News Breaking
Live
wb_sunny

Breaking News

Monolog Bahasa Banjar: Anggang Nang Panghabisan

Monolog Bahasa Banjar: Anggang Nang Panghabisan


Coretan Lamunan Parjalanan

Yuri Muryanto Soedarno *).

waktu malihat
petani tuha mananam puhun
kakanakan mamutiki sampah
uma manyusui anak

urang pintar nang bepandir ekosistem
urang sugih nang bapandir reklamasi
pejabat nang bapandir cagar alam
tukuh nang bapandir pencemaran

nini nang bajualan sayur
urang nang makan matan tung sampah

urang nang bahayau di hutan wan guring di gunung
manjatu hampalam, kuini, durian
urang nang mamutik kalakai di padang baruh
urang nang manaiki puhun maambil madu
urang nang maambil sarang burung di tabing
urang nang malunta di sungai

urang nang katuju
baulah raga di alam bebas

nang mana, nang bangaran
pacinta alam ?!

nang ngapa artinya ?
cuba...

takuni tanah
takuni angin
takuni banyu
takuni api

takuni puhun
takuni hiwan

takuni jua matahari
takuni jua bulan
takuni jua bintang

ba apa manakunakan...
quo vadis ... wan pacinta alam?!
atau batakun
ba apa dirimu?

amun kangalihan
boleh haja kada di jawab

amun tatap manakuni
handak kamana?
ba apa?

saku boleh ai
lah di jawab
... balajaran ... balajar ...

supaya apa
supaya balajar kada balabihan
supaya balajar sawajarnya
supaya balajar saimbang

 ... kada sarana ba a ambil salain kanangan, wan  kada usah batatinggal salain jajak nang baik atawa putih ...

sabab
hati hati banar
bila ampun-NYA
mambulihakan alam sarik

kada kasandangan
kayapakah haratnya

waktu ba papondokan  di tangah hutan
asa kadangaran dalam hayalan,

matan ...

puhun ulin nang tinggi manjulang
umurnya talu kali lipat labih umur padatuan......
basarang si anggang

ada uma anggang wan halarnya
maragap anaknya dua ikung ..
anggang putra satria laksana..
wan
anggang putri intan juwita ..
dihiga dahan nang lain
batinggir abah anggang

badua laki bini bariristaan
sambil mencangangi
anak anaknya .....

umanya
kayapa anak kita ni lah
kamana lagi inya hidup
busiah inya jadi anggang panghabisan

kanapa abahnya
pian bapander kaya itu
satiap mahluk baisian jalan asing asingnya
iya kalu ?

bujur ai umanya
saurang kada karuan rasa
dimapa anak anak kita ini hidup bila hutan nang ngini
puhunnya rabah digantal
tanahnya garasang
sungainya karuh
udaranya kada sigar lagi
wan ba bau

busiah umanya ai
anak anak kita jadi anggang nang penghabisan
marasnya nasib kita ni umanya ai

anggang laki wan anggang bini
kada sadar kalau kadua anaknya balum guring
mandangar pandiran uma abahnya

basisigan li'ir banyu mata
anaknya badua
dua laki bini anggang bacangangan
balilihan jua banyu matanya
manitis
mambasahi tanah

Yuri sewaktu kuliah beraksi dalam salah satu kegiatan lingkungannya. Memberi makan tupai dengan mulutnya. | Foto: Yuri Muryanto Soedarno

*) Yuri, akrab di panggil Ceppe atau Utuh Iyur. Alumni Adm.Niaga FISIP ULM. Salah satu pelopor Mapala Fisipioneer. Kadang menulis tentang lingkungan, traveling, bisnis, dan puisi serta menyikapi fenomena sekitar.-
Space Iklan

Tags

1 komentar: